सासू दशक (आदर्श सासू लक्षण)ㅤ
(सर्व सुनांबद्दल मनोमनी सद्भावना ठेवून...)
ㅤ
जसे बांधलेले तिने कन्वटीला
शिकूनी तुम्ही गंडवावे पतीला ।
जिच्या वागण्यातून युक्ती कळावी
अशी ’गोड’ सासू तुम्हाला मिळावी ॥१॥
ㅤ
कधी गोड बोलूनिया काम होते
कधी उंच पट्टीत गेल्या जमे ते ।
स्वरांच्या रियाजास संथा मिळावी
अशी ’गोड’ सासू तुम्हाला मिळावी ॥२॥
ㅤ
कधीही कुणाचीच तारीफ नाही
तरी काम काढावया वाहवाही ।
शिकूनी अशी धोरणी युक्ति यावी
अशी ’गोड’ सासू तुम्हाला मिळावी ॥३॥
ㅤ
सदा पित्त हो आवळेपाक खाई
बटाटेवड्याच्या दुकानात जाई ।
नव्या रोज शोधून रोगा, कण्हावी
अशी ’गोड’ सासू तुम्हाला मिळावी ॥४॥
ㅤ
सुने पाककौशल्य यावे म्हणोनी
सदा वेगळाले बहाणे करोनी ।
स्वत: चूल सांभाळण्याला न यावी
अशी ’गोड’ सासू तुम्हाला मिळावी ॥५॥
ㅤ
मुले एकटीनेच मी वाढवीली
सुनेला करायास का धाड झाली ?
सदा मालिका पाहण्याला बसावी
अशी ’गोड’ सासू तुम्हाला मिळावी ॥६॥
ㅤ
नटूनी फिराया निघे सांजवेळी
हिच्या मैत्रीणी रोज येती अवेळी ।
उणी एकमेका सुनांची पहावी
अशी ’गोड’ सासू तुम्हाला मिळावी ॥७॥
ㅤ
मुलीची मुले सर्वदा लाडवावी
करी हट्ट नातू, सुने बोल लावी ।
’नसे लेक माझा असा’ ती म्हणावी
अशी ’गोड’ सासू तुम्हाला मिळावी ॥८॥
ㅤ
’हिचे काय पाहूनिया भाळला हा ?
सुखाने मिळे ना, किती वाळला हा ?’
सदा काळजी ही मुलाची करावी
अशी ’गोड’ सासू तुम्हाला मिळावी ॥९॥
ㅤ
कमावून आणाल, पैसे मला द्या
नको एक पैसा हिशोबात वाया ।
तिजोरी नि खाती तिने बाळगावी
अशी ’गोड’ सासू तुम्हाला मिळावी ॥१०॥
ㅤ
-(भुजंगप्रयात)
- स्वामीजी २४-३-११
No comments:
Post a Comment